नेकपा अध्यक्ष दाहालको डरलाग्दो खुलासा

काठमाडौं –नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले नेत्रविक्रम चन्द नेतृत्वको नेकपाले प्रचण्डलाई नै एक नम्बरमा मार्नुपर्छ भनेर माइन्युट गरेको भनेर सरकारले आफूलाई जानकारी गराएको बताएका छन् ।

‘मलाई आज बिहान पनि सरकारको तर्फबाट जानकारी गराइयो, पछिल्लो चरण मेरो कार्यालय सचिव भएर बसेका विप्लवहरूले प्रचण्डलाई नै एक नम्बरमा मार्नुपर्छ भनेर माइन्युट गर्नु भएको छ रे, पहिला मार्नुपर्ने मान्छे भनेर ! टीम पनि खटाउनु भएको छ भनेर सुनाउनुभयो,’ पार्टी केन्द्रीय कार्यालय कोटेश्वरमा बिहीवार वाईसीएलले आयोजना गरेको कार्यक्रममा प्रचण्डले भने, ‘ती साथी सम्झँदा दया माया लाग्या छ, वास्तवमै । के भा’होला ? मलाई मारेरचाहिँ संघीय लोकतान्त्रिक गणतन्त्र, यो परिवर्तन बाँच्ने हो त ?’

प्रचण्डले परिस्थिति २०५२ साल जस्तो नभएको भन्दै अर्को प्रचण्ड बन्ने सपना नदेख्न सुझाव दिए । ‘कतिपय साथीहरूले अर्को प्रचण्ड बन्छु भन्दै हिँडेको सुन्छु । परिस्थिति २०५२ सालको जस्तो छैन, राजतन्त्र पनि छैन,’ प्रचण्डले भने,

‘मैले पनि प्रचण्ड बन्छु भनेर हिँडेको थिइनँ, जनताको काम गर्न हिँडदा हिँड्दै जनताले नै प्रचण्ड बनाइदिए । साथीहरूलाई सुझाव छ, नयाँ बाटो खोज्नुस् । नक्कल गरेर परीक्षा पास भइँदैन ।’

प्रचण्डले निदार खुम्च्याएर सोच्न विप्लवलाई सुझाव दिए । ‘परिस्थिति बदलिएको छ, ठूलो राजनीतिक परिवर्तन हाम्रै कारणले आएको छ,’ उनले भने ।

प्रतिक्रिया जनाउनुहोस्