ट्रम्प र किमको पहिलो भेट

सिंगापुर– अमेरिकी राष्ट्रपति डोनाल्ड ट्रम्पले कोरिया र कोरियाली प्रायद्विपसँगको सम्बन्ध फरक अवस्थामा जाने बताएका छन्। उत्तर कोरियाली प्रमुख नेता किम जोङ उनसँगको वार्तापछि गरिएको संयुक्त पत्रकार सम्मेलनमा बोल्दै राष्ट्रपति ट्रम्पले भने, ‘आज जे घटना भएको छ, त्यसलाई लिएर हामी निकै उत्साहित छौँ। उत्तर कोरिया र समग्र कोरियाली प्रायद्विपबीचमा रहेको हाम्रो सम्बन्ध यसअघिको भन्दा फरक अवस्थामा जानेमा हामी ढुक्क छौँ।’

उनले निकट भविष्यमै विश्वले ठूलाे परिवर्तन देख्ने उद्घाेष गरे। राष्ट्रपति ट्रम्पले यस अवस्थासम्म आइपुग्दा सहयोग गर्ने सबै राष्ट्र तथा पक्षलाई धन्यवादसमेत दिएका छन्। ‘निकै सोहार्दपूर्ण ढगंबाट वार्ता सम्पन्न भएको छ। यसका लागि वातावरण बनाउने चीनसहित सबै पक्षलाई हार्दिक अभार।’, राष्ट्रपति ट्रम्पले भने।

उनले आजको भेटवार्ता र यसका निर्णयलाई लिएर दुवै देशका जनता र समग्र विश्व नै उत्साहित हुने धारणा राखे।

सो क्रममा दुवै नेताले निर्णय पुस्तिकामा हस्ताक्षरसमेत गरेका थिए। हस्ताक्षर गर्नुअघि ट्रम्पले सो पुस्तिका निकै महत्वपूर्ण र व्यापक प्रभावकारी रहेको बताएका थिए। उनले भने,‘यस पुस्तिकामा हस्ताक्षर गर्न पाएकोमा मिस्टर किम र म दुवै भाग्यमानी रहेको अनुभुती भएको छ।’

उनले दुवै पक्षकाबीचमा यसअघिका तिक्तताहरुलाई बिर्सेर जाने सहमति भएको बताए। दुई देश तथा व्यक्तिगत रुपमा पनि एकअर्काका बारेमा बुझ्न शिखर बैठक फलदायक भएको बताउँदै राष्ट्रपति ट्रम्पले नेता किमका बारेमा भने,‘उहाँ धेरै क्षमतावान् हुनुहुन्छ र आफ्नो देशलाई निकै माया गर्नुहुन्छ।’

राष्ट्रपति ट्रम्पले नेता किम जोङ उनसँग ‘विशेष बन्धन’ कायम भएको जिकिर समेत गरे।

संयुक्त पत्रकार समेलनमा संक्षिप्त प्रतिक्रिया दिँदै उत्तर कोरियाली नेता किमले यहाँसम्म आइपुग्नका लागि सजिलो नभएको धारणा राखे। उनले भने,‘हामीलाई यहाँसम्म आइपुग्न सजिलो थिएन। अगाडी बढ्न पुराना सम्झौता तथा अभ्यासहरु हाम्रा लागि बाधक बनिरहेका थिए। तर ती सबै समस्यालाई पन्छ्याउन हामी सफल भएका छौँ।’

संयुक्त पत्रकार सम्मेलनका क्रममा दुवै नेता हर्षित मुद्रामा देखिन्थे।

 

प्रतिक्रिया जनाउनुहोस्